Тоғыс тұрғындарымен кездесу өтті

  «Жаңа Қазақстанды» құру жолында еліміздің ахуалын одан әрі дамытып, жақсартудың барлық мүмкіндіктерін қарастыру Тоқаевтың басты мақсаттарының бірі. Еліміздің жаңа кезеңге қадам басуы саяси жаңғырудың экономикалық өзгерістеріне ұласады. Әділетті Мемлекет, Әділетті Экономика, Әділетті қоғам қағидаттарына басымдық беріледі.  Осы және өзге де маңызды тақырыптар төңірегінде Еңбекші ауданына қарасты «Тоғыс» тұрғын алабының тұрғындарымен өткен кездесуде айтылды.  

  ҚР Президенттігіне үміткер Қ.Тоқаевтың сенімді өкілдері, республикалық және қалалық штаб мүшелері  Ғани Ташқараев, Айгүл Қапбарова, Гүлжайна Жартыбекова, Бекайдар Тулегенов, Еркін Сатқанбаев, Гүлнар Құрманбекова, Талғат Балтабаев, Данабек Исабеков, үгіт — насихат барысында кандидаттың сайлауалды бағдарламасын түсіндірді.

   «Биылғы жыл «Балалар жылы» деп жарияланды. Бұл балаларды қорғау мәселесі мемлекет үшін басымдықтардың бірі екенін көрсетеді. Әрбір ата-ана баласының дені сау, бақытты болып өскенін, терең білім алып, өзін-өзі дамытумен айналысқанын қалайды. Қазақстанда 7500 мыңнан астам мектеп бар. Жыл сайын бір мың мектепті заман талабына сай жаңғырту жоспарлануда. Бірінші кезекте шағын қала, аудан орталығы мен ауылдағы мектептер жаңартылатын болады. Кандидаттың сайлауалды бағдарламасында әлеуметтік, білім, экономика, т.б барлық сала қамтылып отыр»,- деді Ғани Әбдіғаниұлы.

  Кездесу соңында №120 орта мектепке жиналған Тоғыс тұрғындары сайлауда Қасым-Жомарт Тоқаевты қолдап дауыс беретіндерін жеткізді.